“Şansımızı itirdiyimizə görə çox məyusuq”
23.03.2019 , 17:17
Avropa çempionatının elit-raund mərhələsində çıxış edən 19 yaşadək futbolçulardan ibarət Azərbaycan milli komandası irlandiyalı həmyaşıdlılarına 1:3 hesabı ilə məğlub olub.
Millimizin baş məşqçisi Vüqar Məmməd oyundan sonra affa.az-a açıqlama verib:
“Bu gün Avropanın ən güclü komandalarından biri ilə oynadıq. Rəqib istər fiziki, istər taktiki baxımdan çox bacarıqlı komanda idi. Uduzmağımıza baxmayaraq, bu futbolçularla gələcəkdə yaxşı işlər görmək olar. Sadəcə, hər biri ayrı-ayrılıqda öz üzərində çox çalışmalıdırlar. Futbolçularıma bu oyunda göstərdikləri əzmkarlığa görə təşəkkür edirəm. Final mərhələsinə şansımızı itirdiyimizə görə çox məyusuq. Bu komanda final mərhələsinə layiq komanda idi, azacıq diqqətsizliyə görə bu gün məğlub olduq. İrlandiya millisini təbrik edirəm. Hakimliklə bağlı danışmamaq barədə özümə söz vermişəm”.
Qeyd edək ki, U19 millimiz ilk görüşdə rusiyalı 19 yaşlı futbolçularla görüşdə 0:0 hesablı sülhə razılaşmışdı.
