“İnter”in futbolçusu İbrahima Niasse klubun rəsmi saytına müsahibə verib. Korner.az həmin müsahibəni sizə təqdim edir.
– Öncə “Qarabağ”la keçirilən oyun barədə fikirlərinizi bilmək istərdik.
– “Qarabağ” doğma divarlar arasında daha yaxşı oynayan güclü komanda olduğunu bilirdik. Təəssüf ki, “İnter”ə nəyə layiq olduğunu göstərmək müyəssər olmadı. Etiraf edim ki, rəqib daha yaxşı oynadı və buna görə də qalib gəldi. Çox təəssüf ki, bu matçda məğlubiyyətə uğradıq. Hətta heç-heçə bizim üçün pis nəticə olmazdı, lakin 1 xal qazanmaq bizə nəsib olmadı.
– İlk yarıda zədə üzündən meydanı tərk etməli oldunuz…
– Bəli, ağrı hiss etdim və anladım ki, matçı davam etdirə bilməyəcəyəm. Ancaq həkimlər izah etdilər ki, zədə o qədər də ciddi deyil.
– Növbəti qarşılaşmada oynayacağınız artıq məlumdur?
– Bu günlərdə aydın olacaq, ancaq həkimlər beşinci gün meydana çıxmağım üçün əllərindən gələni edəcəklərini bildirirlər. Ümid edirəm ki, hər şey yaxşı olacaq və mən belə vacib məqamda komandaya kömək edə biləcəyəm.
– “Bakı” ilə keçiriləcək sonuncu matç barədə nə deyə bilərsiniz?
– Bu oyun bizim üçün çox vacibdir. Toparlanmalı və var-gücümüzlə oynamalıyıq. Başa düşürük ki, bunu etmək asan olmayacaq. Lakin məqsədimizə nail olmaq üçün əlimizdən gələni etməyə çalışacağıq.
– Avroliqaya vəsiqənin taleyi məhz bu oyunun nəticəsindən asılı olacaq. Çempionatın son matçı ərəfəsində kifayət qədər çətin vəziyyət yaranıb və qalan 2 vəsiqəyə 3 komanda iddia edir…
– Bəli, turnir cədvəli doğrudan da bir qədər qarışıqdır, lakin bizim vəzifəmiz sadədir – qələbə qazanmalıyıq. O zaman Avropanın qapıları üzümüzə açılacaq. Şansımız öz əlimizdədir və ondan tam yararlanmaq lazımdır.
