Samir Abasov: “Ömər Paşayev məzuniyyət götürsəydi, bir az dincələrdim”
22.09.2018 , 23:02
Topaz Premyer Liqasında V turun “Zirə” – “Neftçi” (1:2) oyunundan sonra keçirilən mətbuat konfransında meydan sahiblərinin baş məşqçisi Samir Abasov jurnalistlərin suallarını cavablandırdı.
O, əvvəlcə matç haqda fikirlərini bildirdi…
– İstəyirdik ki, qələbə qazanaq. Komandada inkişafın olduğunu hiss edirəm. İnanıram ki, bunu artıracağıq. Ancaq bəzi futbolçulardan narazıyam. Əgər qələbə qazanmaq istəyirsənsə, ürəyini, ruhunu qoymalısan meydanda. Bəzi futbolçular fikirləşir ki, məşqçimdeyəcək, biz də çıxıb oynayacağıq və qələbə qazanmalıyıq. Ancaq tək bununla olmur. Ruhla oynamaq lazımdı. Əgər futbolçular ürək qoysaydılar, “Neftçi”yə qalib gələ bilərdik. Hücumda problemlərimiz var. Bu gün uduzmalı deyildik.
– Samir Abasovla oyunun bugünkü 4-cü hakimi Ömər Paşayevin arasında nə problem var ki, o, həmişə sizi texniki zonadan uzaqlaşdırır. Bir də o “striptiz-şou” nə idi ki, iki futbolçunuzu paltarını dəyişməyə göndərdi?
– O, maya kimi məzuniyyət götürsə, bəlkə mən də rahat olaraq. Oyundan əvvəl soruşduq və dedilər ki, alt geyimi ağ rəngdə olmalıdı. Amma bir futbolçunu ağ rəngdə olduğuna görə çıxartdı, digərini göy rəngli geyimə görə. Özümüz də bilmədik ki, məqsədi nədi. Ömər Paşayev, bəlkə də, bir tərəfi görür, o birini yox. Bunu bilmirəm. Xəbərim olsaydı, əvvəldən digər texniki zonanı seçərdik.
– Əsəbi davranışlarınızın komandanıza zərər verdiyini düşünmürsüz. Bəlkə qovulmasaydız komanda qalib gələrdi…
– Sakit dura bilmirəm. Bu, əsəb deyil. İstəyirəm ki, mən necəyəmsə, onlar da belə oynasınlar. Bəlkə də, mən orda olsaydım, komanda uduzmazdı. Məndə düzələsi bir şey yoxdu.
