Avropa Liqasında sabah “Mladost”la qarşılaşacaq “Neftçi”nin baş məşqçisi Samir Əliyev, futbolçuları Rəhman Hacıyev və Elşən Abdullayev bu gün mətbuat nümayəndələrinin suallarını cavablandırıblar.
Korner.az konfransda səslənən fikirlərin xülasəsini təqdim edir.
Samir Əliyev: Komandadan 10 nəfər gedib. Klubun strategiyası dəyişib. Gənclərə üstünlük verəcəyik. Siz gözləmədiyiniz futbolçular meydana çıxacaq. Yoxlama görüşləri keçirdik, bütün oyunçuları yoxladıq. Doğrudur, hər üç oyunda uduzduq, amma irəliyəşlər göz önündə idi. Gənc futbolçularımız perspektivlidir. Psixoloji cəhətdən heç bir problem olmayacaq. Rəqibi təhlil etmişik. Güclü və zəif cəhətləri bilirik. Sabah bundan istifadə etmək istəyəcəyik. 4-3-3 sxemini təkcə bu oyun üçün nəzərdə tutmamışıq. Əvəzedici heyətdə də bunu tətbiq etdik və uğurlu oldu. Mövsüm ərzində burda qalsam, bu sistem dəyişməyəcək. Daha da təkmilləşdirmək istəyirik. Futbolçularda irəliləyiş var. Sadəcə bir az səbirli olun.
Artıq start heyəti müəyyənləşdirmişik. Baxmayaraq ki, təcrübəli futbolçularımız azdır, sabah azarkeşlər mübariz komanda görəcək. Bilirəm, artıq heç birinizin inamı yoxdur. Bu komandanı gənclərlə necə uğurlu dəyişdiyini görəcəksiz. “Mançester Yunayted” dünyanın ən varlı klubudur, hər şeyə sahibdir, amma Van Qaal heç nə edə bilmir. Heç biz də düşünmürük ki, qısa müddətdə əla komanda quracağıq. Oyun vaxtı iftar açmaları üçün azarkeşlərə su paylanılacaq.
Rəhman Hacıyev: Komandada çox dəyişikliklər oldu. Demək olar, sıfırdan başladıq. Sabahkı oyun bizim üçün çox vacibdir, çox ciddi hazırlaşmışıq. Ancaq qələbə!
Elşən Abdullayev: Komandada təcrübəli futbolçular çox az olsa da, biz bir-birimizə inanırıq. Sabah bir yumruq olub qələbə qazanacağıq. Komandada yeni sistem var, bunu sabah göstərəcəyik.
