“Şamaxı”ya Premyer Liqa lisenziyası verildi
27.05.2024 , 14:46
Bu gün AFFA-nın Lisenziya Komissiyasının iclası keçirilib.
Korner.az xəbər verir ki, iclasda 2024/2025-ci illər mövsümündə Misli Premyer Liqasında, 1-ci liqada və AFFA Yüksək Qızlar Liqasında iştirak etmək üçün müraciət etmiş klubların sənədlərinə baxılıb.
AFFA-nın Lisenziya Komissiyası Azərbaycan futbol klublarının lisenziyalaşdırılması üzrə qaydaların 9-cu maddəsinə əsaslanmış müzakirələrdən sonra aşağıdakıları qərara alıb:
Premyer Liqada iştirak etmək üçün “İmişli” PFK və “Şamaxı” FK İB (birinci divizionun qalibi – red.) lisenziya alıb.
“İrəvan” FK, “Qaradağ Lökbatan” FK, MOİK PFK, “Zaqatala” PFK-ya Premyer Liqa lisenziyası verilməyib.
1-ci liqa yarışlarında iştirak etmək üçün “Araz Saatlı” FK, “Bakı Sportinq” FK, “Difai” FK, “Cəbrayıl” FK, “Füzuli” FK, “Karvan” Yevlax FK, “Kür-Araz” FK, “Qaradağ Lökbatan” FK, “Mingəçevir” FK İB, MOİK PFK, “Şahdağ Qusar” FK, “Zaqatala” PFK-ya lisenziya verilib.
“Ağdaş” İK, “Dinamo” (Bakı) FK İB, “Göygöl” FK, “İrəvan” FK, “Lerik” FK, “Şəki Siti”, “Şəfa” FK, “Şəmkir” PFK isə 1-ci liqaya lisenziya ala bilməyiblər.
Yüksək Qızlar Liqasında iştirak etmək üçün “Baku Juniors” İK, “Balxurma Balakən” FK-ya lisenziya verilib.
Məlumatda o da bildirilib ki, “Balxurma Balakən” FK növbəti mövsümdən etibarən “Dirçəliş” FK adı ilə çıxış edəcək.
