"İnter"in gürcüstanlı futbolçusu Laşa Salukvadze klubun rəsmi saytına "Bakı" ilə matç (2:2) barəsində açıqlamalar verib.
Korner.az həmin müsahibəni sizə təqdim edir.
-Laşa, "Bakı" ilə oyun kifayət qədər çətin oldu. Fikirləriniz?
-Anlayırdıq ki, bizə məğlub olmaq olmaz. Komandamız turnir cədvəlində sonuncu yerdədir və bizim oyun uduzmağa haqqımız yoxdur. Hakimlik haqqında danışmaq istəmirəm, lakin qapımıza təyin olunan 11 metrə cərimə zərbəsi haqqında danışmaya bilmərəm. Buna baxmayaraq əzmkar oyun oynadıq. Uzun müddət geridə olduq. Sonra hesabı bərabərləşdirdik. Sonda önə də keçə bilərdik, ancaq nəticə etibarı ilə 1 xal aldıq.
-İkinci buraxılmış qol birmənalı qarşılanmadı.Yan xətt hakimi qaydanı "Bakı"nın futbolçularının pozduğunu söyləsə də, baş hakim topu "Bakı"ya verdi və qaydanı sizin pozduğunuzu dedi.
-Bəli, məhz belə oldu. Yan xətt hakimi mənə qarşı qaydanın pozulduğunu görmüşdü. Lakin epizoda uzaq olan baş hakim başqa cür qərar verdi. Yan hakim epizodu daha yaxşı görmüşdü. Baş hakimin niyə belə qərar verdiyini anlamadım.
-Yeri gəlmişkən ilk turdakı zədədən sonra ilk oyununuz idi. Çətin olmadı?
-Etiraf edirəm ki, çətin idi. Mən hələ tam formamı yığmamışam. Matçın gedişində ağrılar hiss etdim və sonda buna görə səhv etdim. Lakin zamanla daha yaxşı oyunlar oynayacağıma inanıram.
-"Bakı" ilə matçda Kaxaber Tsxadadze üç mərkəz müdafiəçisi ilə oynadı. Bu taktiki sxemdə oynamaq sizə çətin olmadı?
-Bir qədər çətin oldu. Çünki hələ tam uyğunlaşmamışıq. İnanıram ki, növbəti oyunlarda daha da yaxşı olacaq hər şey.
-Mövsüm "İnter" üçün uğursuz start götürüb. Sizcə komanda vəziyyəti düzəldib yüksək pillələrdə yer ala biləcək.
-Biz bu vəziyyətdən çıxcağıq. "İnter" həmişə yüksək yerlər üçün mübarizələr aparıb. Futbolda belə uğursuzluqlar olur. Biz öz oyunumuzu tapıb, azarkeşlərimizi sevindirəceyik.
