“Mən futbol oynamağa Malidə başlamışam. 12-15 yaşlılardan ibarət komandalarda top qovduqdan sonra ikinci divizion klubuna keçdim. Bu minvalla sonradan birinci divizionda da təxminən iki mövsüm çıxış etdim. İkinci mövsümün başa çatmasına az qalmış məni “Xəzər Lənkəran”ın məşqçiləri tapdı. Dəvət etdilər, gəldim. O vaxtdan buradayam”.
Korner.az-ın məlumatına görə, bu sözləri “Xəzər Lənkəran”ın yarımmüdafiəçisi Sadio Tounkara deyib.
2012-ci ildə Cüneyt Biçərin “Janna D`Ark”dan tapıb ölkəmizə gətirdiyi Fransanın footmercato.net saytına açıqlamasında Azərbaycan Premyer Liqasının səviyyəsindən danışıb: “Azərbaycan çempionatını Avropanın orta səviyyəli çempionatlarından biri hesab edirəm. Mən məhz bu komanda ilə avrokuboklarda çıxış etmək şansı qazandım. Polşa “Lex”inə, İsrail klublarına qarşı mübarizə aparmaq şansımız olub. Bu, çox faydalı təcrübə idi”.
22 yaşlı oyunçu daha güclü çempionatlarda oynamaq arzusunu gizlətməyib: “Mən daha güclü çempionatda oynamaq istəyirəm. Məsələn, Fransa və ya İspaniyada oynamaq istərdim ki, futbolçu kimi daha da inkişaf edim. Əlbəttə, Fransa çempionatında da oynamaq istəyirəm”.