Şəhidlərin xatirəsinə həsr olunmuş futbol turnirinə yekun vurulub
28.03.2023 , 14:58
Masallı rayon Gənclər və İdman İdarəsinin təşkilatçılığı ilə Ərəb kənd stadionunda şəhidlərinin xatirəsinə həsr olunmuş gənclərdən ibarət komandalar arasında futbol üzrə rayon turniri başa çatıb.
Korner.az xəbər verir ki, Masallı rayon Gənclər və İdman İdarəsinin təşkilatçılığı ilə martın 15-də startı verilən turnirdə 9 komanda mübarizə aparıb.
Turnirin final oyununda Qarğalıq və Eminli kəndlərinin komandaları qarşılaşıblar. Maraqlı keçən oyun Qarğalıq komandasının qələbəsi ilə başa çatıb.
Turnirin mükafatlandırma mərasimində Masallı rayon Gənclər və İdman İdarəsinin rəisi Sabiq Cahangirov turnirin məqsəd və vəzifələri barədə danışaraq, yarışın gənclərin vətənpərvərlik və dövlətçilik prinsipləri əsasında tərbiyə olunması, qəhrəmanlıq nümunələrinin gənclər arasında təbliğ edilməsi, şəhidlərin əziz xatirəsinin əbədiləşdirilməsi, həmçinin futbolun kütləviliyinə nail olmaq və gənclərin asudə vaxtlarının səmərəli təşkil olunmasında mühüm əhəmiyyət kəsb etdiyini diqqətə çatdırıb.
Mükafatlandırma mərasimində iştirak edən Vətən Müharibəsi şəhidi Masim Qurbanovun atası Hafis Qurbanov qalib komandaları təbrik edib, onlara gələcək yarışlarda uğurlar arzulayıb.
Sonda qalib komandalara kubok və diplomlar təqdim edilib.
