“Şəfa” stadionunda xüsusi kameralar quraşdırılıb.
Korner.az-ın məlumatına görə, bu kameralar sayəsində futbolçuların fiziki aktivliyinin və göstəricilərinin ətraflı analizini əldə etmək mümkün olacaq. Bundan sonra futbolçuların kilometrajının və aktivliyinin hesablanması klubun hər ev matçında həyata keçiriləcək.
Arenadakı bu yenilik “İnter”lə “InStat Football” şirkəti arasındakı fəal əməkdaşlıq çərçivəsində gerçəkləşib. Belə ki, klub futbolun sistemli və dərin analizində ixtisaslaşan bu şirkətlə artıq 2 ildir əməkdaşlıq edir. “InStat Football”- dünyanın 20-dən artıq futbol turnirini araşdıran beynəlxalq innovasiya şirkətidir. Bu şirkət sayəsində futbol klubları təkcə komandaları haqqında deyil, həmçinin bütün rəqibləri barədə də müfəssəl məlumatlar alır.
“İnter”in “InStat Football” şirkəti ilə əməkdaşlığının startı 2011-ci ilə təsadüf edir. Ötən müddət ərzində şirkət kluba komandanın keçirdiyi bütün oyunların ətraflı xarakteristikasını təqdim edir.
Qeyd edək ki, 2007-ci ildə təsis edilən “InStat Football” şirkətinin tam olmayan 5 il ərzində 70-dən klubla əməkdaşlıq münasibətləri var. Şirkət Moskva şəhərində yerləşir, tərəfdaşları Hollandiyada, Rumıniyada, Braziliyada, Sloveniyada, Çexiyada və digər ölkələrdə fəaliyyət göstərir. “InStat Football” şirkəti MDB ölkələrində və Şərqi Avropa ölkələrinin əksəriyyətində peşəkar futbol analizi bazarında liderdir. Şirkət biznesini Qərbi Avropa, Asiya və Amerika ölkələrində də fəal şəkildə genişləndirir.
