“Səbail”lə “Qəbələ”nin 24-cü dueli
23.02.2023 , 19:15
Bu həftə Misli Premyer Liqasında XXIV tura start veriləcək.
Korner.az xəbər verir ki, “Qəbələ” ilk oyun günündə meydana çıxacaq.
“Qırmızı-qaralar” günün ikinci matçında “Səbail”lə görüşəcək.
Bakıdakı görüş rəqiblər arasında 24-cü duel olacaq. Əvvəlki 23 oyunda “Qəbələ” böyük üstünlüyə malikdir. 13 qələbəsi olan “qırmızı-qaralar” 5 görüşdən sülhlə ayrılıb və eyni sayda matçda uduzub. 42 qol vuran bu komanda 23 top buraxıb. Baqali Dabo “Səbail”ə daha çox – 6 qol vurub. Ülvi İsgəndərov cari mövsümün hər iki görüşündə fərqlənib. “Qəbələ” bu matçlarda eyni hesabla qalib gəlib – 2:1.
“Qırmızı-qaralar” paytaxt təmsilçisi ilə 21 dəfə çempionat, 2 dəfə kubokda üz-üzə gəlib. Premyer Liqada 11 qələbə qazanan “Qəbələ” 5 dəfə bir xalla kifayətlənib. Digər 5 oyunda “Səbail” qalib gəlib. 37 qol vuran “Qəbələ” 21 top buraxıb.
Rəqib meydanında 13-cü dəfə “Səbail”lə qarşılaşacaq “qırmızı-qaralar” səfərdə 5 qələbə və 2 heç-heçəyə imza atıb. 5 görüşdə meydan sahibləri qalib gəlib. Bu matçlarda “Qəbələ” 18, rəqibi 17 dəfə fərqlənib.
Xatırladaq ki, fevralın 24-də keçiriləcək matç “ASCO Arena”da baş tutacaq. Oyunun start fiti 19:00-də veriləcək.
