Ölkə futbolu

“Səbail” – “Neftçi” görüşündə diqqət çəkən məqamlar

15.04.2019 , 18:30

Topaz Premyer Liqasının XXIV turu “Səbail” üçün yubileylərlə əlamətdar olub.

PFL-in rəsmi saytına istinadən verilən xəbərə görə, öz meydanında “Neftçi” ilə 2:2 hesablı heç-heçə edən Aftandil Hacıyevin yetirmələri Premyer Liqada 10-cu dəfə bərabərliyə imza atıblar. Yubiley heç-heçəsi 52-ci qarşılaşmada qeydə alınıb. Bu, paytaxt təmsilçisinin öz meydanında 5-ci sülhü olub. Doğma divarlar arasında 26-cı matçını keçirən komanda həm də evdə 15-ci qolunu vurub. Yubiley qoluna Ağabala Ramazanov imza atıb.

Abbasovla Ramazanov üçün eyni göstərici
Topaz Premyer Liqasının XXIV turu iki futbolçunun Azərbaycan çempionatlarında yubiley qolu ilə yadda qalıb. Hər iki oyunçu “Səbail” – “Neftçi” qarşılaşmasında fərqlənib. İlk qolu vuran Mirabdulla Abbasov özünün Premyer Liqada 20-ci qoluna imza atıb. O, bu rəqəmə 79-cu matçda çatıb. Hücumçu bu qollardan 12-nə (52 oyun) indiki komandasında imza atıb. Oyunun gedişində meydan sahiblərini önə çıxaran Ağabala Ramazanov da 20-ci qolunu vurub. O, 139-cu matçında buna nail olub. Forvard indiki klubunda keçirdiyi 20-ci oyunda 5-ci qola imza atıb.

Mövsümdə yeni rekord
“Səbail”in futbolçusu Ədilxan Qarəhmədov cari mövsümdə qol vuran ən gənc futbolçu olub. Topaz Premyer Liqasının XXIV turunun “Neftçi” ilə oyununda (2:2) fərqlənən futbolçu 17 yaş 313 günlüyündə qol sevinci yaşayıb. 2001-ci il iyunun 5–də anadan olan gənc oyunçu mövsümün rekordunu 2 il 79 gün yeniləyib. Bu matçadək rekord 20 yaş 27 günlüyündə qol vuran Anton Krivotsyuka məxsus idi. “Neftçi”nin futbolçusu “Keşlə”ylə 2018-ci il sentyabrın 16-da keçirilən görüşündə rəqib qapısına yol tapmışdı.

Son yazılar

Yuxarı