“Neftçi”də istefa baş verib. Klubun Media və Marketinq Departamentinin rəhbəri Rüstəm Əfsərli postundan ayrılıb.
Məlumatı “FutbolPress”ə açıqlamasında tanınmış şərhçi özü də təsdiqlədi. Son 4 ayı bu vəzifədə çalışan Əfsərli “İnter”lə oyundan sonra rəsmən paytaxt klubunda tutduğu vəzifəni tərk edəcək. O, bu qərarının şəxsi işləri ilə bağlı olduğunu söylədi:
“Neftçi” ilə hər şey qaydasındadı. Hamı ilə münasibətim də yüksək səviyyədə idi. Sadəcə şəxsi işlərimlə əlaqədar, yeni layihələrə görə klubdan getməyi qərara aldım. Başqa hər hansısa problem yoxdu”.
“CBC Sport”un yaradılmasında əməyi böyük olan Rüstəm bəy “Neftçi”dəki işi ilə yanaşı bu televiziya kanalında da çalışırdı. Bundan sonra o, tamamilə “CBC Sport”da fəaliyyət göstərəcək. Əfsərli bir sıra yeniliklər edəcəklərini bildirdi:
“Bilirsiz ki, “Neftçi”də işləməklə bərabər “CBC Sport”da şərhçilik fəaliyyətimi də davam etdirirdim. Ancaq bunlar artıq bir-birinə mane olurdu. Bir sıra yeni layihələrimiz var. Buna görə də yalnız onlarla məşğul olmağı, bütün diqqətimi onlara yönəltməyi qərara almışam. “Neftçi”dən ayrılıb yenidən öz evimə qayıtmış kimi oluram. İzləyicilərimizi yeni işlərimizlə sevindirməyə çalışacağıq. Klubdan ayrılmağımın səbəbi yalnız budu. Kimsə fikirləşməsin ki, hər hansı problemlə əlaqədar “Neftçi”ni tərk edirəm”.
