Ruslan komanda ilə məşqlərə başladı
07.01.2019 , 19:34
“Neftçi”nin kapitanı Ruslan Abışov komanda ilə məşqlərə başlayıb.
Korner.az Qol.az_a istinadən xəbər verir ki, dizindəki zədə səbəbindən uzun müddət yaşıl meydandan kənarda qalan və noyabrın sonlarından etibarən fərdi qaydada məşq edən müdafiəçi bu gün ümumi hazırlıqda iştirak edib.
Avropa Liqasının 1-ci təsnifat mərhələsinin “Uypeşt”lə cavab oyununda (0:4) zədələnən Ruslan Abışovun sol dizində ön çarpaz bağ tam qopmuş, meniski cırılmışdı. Bundan sonra o, əməliyyat olunmuşdu.
Qeyd edək ki, bu gün istirahəti başa vuran “Neftçi” məşqləri bərpa edib. “Ağ-qaralar”ın Bakıdakı təlim-məşq toplanışı yanvarın 12-də başa çatacaq. Yanvarın 13-dən 27-dək Antalyada hazırlıq keçəcək “Neftçi” 3 yoxlama oyunu keçirəcək. Komanda ayın 18-də “Qaz Metan” (Rumıniya), 23-də “Slovan” (Liberes, Çexiya), 26-da isə “Beroe” (Bolqarıstan) klubları ilə qarşılaşacaq.
