"Xəzər Lənkəran" Azərbaycan yığma komandasının aparıcı üzvü Ruslan Abışovu heyətinə cəlb edib.
Korner.az-ın məlumatına görə, futbolçu ilə klub arasında 2 il müddətinə müqavilə imzalanıb. Hazırda Avstriyada "Xəzər Lənkəran"ın düşərgəsində olan Abışov artıq komandanın məşqlərinə qoşulub.
24 yaşlı futbolçu 2009-cu ildən etibarən milli komandanın sıralarına çağırılır. Qısa müddət ərzində yığmanın liderlərindən birinə çevrilən Abışov əsasən mərkəz müdafiəçisi və dayaq yarımmüdafiəçisi mövqelərində çıxış edir. Gənc futbolçu millinin heyətində yoldaşlıq oyununda Çexiya yığma komandasına, həmçinin AVRO 2012 seçmə mərhələsində Belçika yığmasına vurduğu qollarla da yadda qalıb.
Ruslan Abışov 2010/2011 mövsümündə Premyer Liqanın ən yaxşı müdafiəçisi adına layiq görülüb. Müdafiəçi 2006-2012-ci illərdə "Neftçi" klubunun heyətində çıxış edib.
