"Neftçi"nin futbolçusu Ruslan Əmircanovun Korner.az saytına müsahibəsi
-Ardıcıl olaraq ikinci dəfə çempion olduz. Bununla bağlı təəsüratlarınızı bilmək istəyərdim.
Ötən mövsüm çempion olarkən deyirdilər ki, "Neftçi"ni "yuxarı"dan kimsə irəli aparır, köməklik göstərirlər. Lakin bu mövsüm çempion olmaqla bir daha sübut etdik ki, "Neftçi" öz gücünə arxayın komandadı. İki il transfer etmədən ardıcıl çempion oluruqsa, deməli "Neftçi" Azərbaycanda bir nömrəli komandadı. İndiki vəziyyətdə bizimlə rəqabət apara biləcək komanda yoxdu.
-Ölkəmizi Çempionlar Liqasında təmsil edəcəksiz. "Neftçi"dən nə gözləyək?
Futbolçularda inam var ki, biz birinci mərhələni adlaya bilərik. Əgər gücü bir yerə qoysaq, mərhələ adlayıb azarkeşlərimizi sevindirərik.
-Bu heyətlə mərhələ keçmək, səncə, mümkündümü? Çünki eyni heyət "Dinamo" qarşısında ötən il fiaskoya uğradı.
Keçən il bizim bəxtimiz gətirmədi. Mərhələnin ən güclü komandalarından "Dinamo" bizə rəqib oldu. Bu il yenə bizə rəqib ola bilər. Ona görə də futbolçuların transfer ilə bağlı biz danışa bilmərik. Bunu rəhbərlik edəcək.
-Qarşıdan kubokun finalı gəlir. "Bakı" ilə oyun haqda nə deyərdin?
"Bakı"ya sonuncu oyunda uduzduq. Amma onların hansı taktika ilə oynacaqlarını artıq bilirik. Çətin oyun olacaq. Bir anlıq boşluq buraxsaq, bağışlamazlar.
-Rəşad Sadiqovun "Neftçi"yə keçməsi komandanın gücünə-güc qata biləcəkmi?
Rəşad Azərbaycanın güclü futbolçularından biridi və bilirik ki, "Neftçi" komandasına onun çox güclü xeyiri dəyər. Əgər onun potensialına inanmasaydılar "Neftçi"yə gətirməzdilər. "Neftçi" elə bir komandadır ki, burda hər futbolçu oynaya bilməz.
-Onun keçidi bir çox söz-söhbətlərə yol açdı. Sən onun etdiyi eyni hərəkəti edərdinmi?
Yox. Çünki çempionat getdiyi bir vaxtda öz klubuma sadiqlik göstərərəm. Rəşad Sadiqov düzgün hərəkət etməyib. Məncə, düzgün hərəkət deyil ki, müqavilənin müddəti bitməmiş digər klubla gizli danışıqlar aparasan. Əgər klub desə ki, bizə lazım deyilsən, onda özümə yeni klub axtararam. Yoxsa onun kimi hərəkət eləmərəm.
Səxavət QURBANOV
