Avropa çempionatının 1/4 finalında İtaliyaya penaltilər seriyasında uduzaraq mübarizəni dayandıran İngiltərə millisi vətəninə başıuca dönəcək. Korner.az-ın məlumatına görə, bunu ingilislərin baş məşqçisi Roy Hocson deyib. Çalışdırıcı Avro-2012-də məğlub olmamalarını ön plana çıxardaraq bunları deyib:
“Bəxt İtaliya millisinin tərəfində oldu. Rəqib bundan istifadə edərək ardıcıl hücumlar qururdu. Amma biz çempionatı məğlubiyyətsiz tərk edirik. Düzdür, İtaliyaya məğlub olduq. Lakin bu, əsas vaxtda deyil, penaltilər seriyasında baş verdi. Bunun üçün də də İngiltərəyə başıuca dönəcəyik.
Sözün düzü, penaltilər seriyası başlayanda qalib olacağımızı fikirləşdim. Çünki matç ərzində yaxşı çıxış etməmişdik. Ancaq futbolçularımı qınaya bilmərəm. Onların əksəriyyəti həddindən artıq yorulmuşdu. İtaliya isə penaltilər seriyasında bizdən daha dəqiq oldu və yarımfinala yüksəldi”.
