“Yenidən avrokubok mövsümündə görüşməyimizə şadam. Ötən ilki çıxışımızdan xeyli müddət keçib. Komandamız yenidir. Komandamın nəyə qadir olduğunu görmək istəyirəm”.
Bu sözləri “Qəbələ” klubunun baş məşqçisi Roman Qriqorçuk Avropa Liqasının I təsnifat mərhələsinin Gürcüstan “Samtredia”sı ilə oyundan öncə keçirilən mətbuat konfransında deyib.
Ukraynalı mütəxəssis sabahkı oyun haqda bunları bildirib: “Qısa vaxt ərzində yeni futbolçularla hazırlaşmışıq. Yeni futbolçuların işindən razıyam. Start heyətini artıq müəyyənləşdirmişəm. Amma onu açıqlamaq istəmirəm. Komandanın bəzi yetirmələri də bizə qoşulmuşdu. Bəziləri hazırdır, amma bəziləri yox. Yeni futbolçular arasında hücumameyllilər daha çoxdur.
Onlar bizim sistemi bilir. Ancaq tək bilmək yox, onu nümayiş etdirmək lazımdır. Bunu meydanda görmək özümə də maraqlıdır. Sabah bunu görəcəyik. Rəqibin oyununa gəldikdə onların da hücumameylli yaxşı futbolçular. Onlar müxtəlif kombinasiyalara əl atırlar və qarşısını almaq elə də asan deyil. Ancaq rəqibi yaxşı analiz etmişik. Yaxşı nəticəni öz gücümüzlə əldə edə bilərik” (Sportnet.az).
