Topaz Premyer Liqasının XXII turunda keçirilən “Neftçi” – “Qəbələ” matçı meydan sahiblərinin 1:0 hesablı qələbəsi ilə başa çatıb.
Korner.az-ın məlumatına görə, qarşılaşmadan sonra qonaqların baş məşqçisi Roman Qriqorçuk məğlubiyyəti şərh edib.
– Məğlubiyyətin səbəbini nədə görürsüz?
– Çətin oyun oldu. Bizim ilk hissədə real qol imkanlarımız oldu. Ancaq bundan yararlana bilmədik. Bu da məğlubiyyətin səbəblərindən biridi. Buraxdığımız qol isə səhvdən oldu. Düzü, komandamdan belə səhv gözləmirdim.
– Araz Abdullayevin oyununu necə dəyərləndirirsiz? Onu niyə 90 dəqiqə meydanda saxladınız?
– Ruslan Qurbanov xəstələnib, Rəşad Sadiqov isə zədələnib. Bu da limitlə bağlı işimizi çətinə salır. Yerli oyunçu olmadığından, Arazı əvəzləyə bilmədim. Dabo ilə Zenyovu meydana daxil etmək üçün müdafiəçilərdən birini çıxarmaq məcburiyyətində qaldım. Belə vəziyyətdə qələbələr əldə etmək çətindi. Ancaq durumdan şikayətlənmirik.
– Rafael Santos əvəzlənəndə bunu etirazla qarşılaşdı. Müdafiəçinin bu davranışına münasibətiniz necədi?
– Mən Rafaelə tərəfə baxmadım. İnanın ki, belə bir şey görməmişəm. Buna görə də şərh verə bilmərəm. Əvəzlənəndən sonra paltardəyişmə otağına getməsi normaldı. O, yaxşı futbolçudu. Santosun xətrini çox istəyirəm.
– Məğlubiyyətin səbəblərindən birini də futbolçuların fasilə müddətində millinin heyətinə cəlb edilməsi ilə əlaqələndirmək olar?
– Xeyr. Heç vaxt belə düşünmürəm. Mən fəxr edirəm ki, futbolçularım milliyə dəvət alır. Təlim-məşq toplanışınları hər zaman olur və olacaq. Cavid Hüseynovu çıxmaq şərti ilə, digərləri səviyyəsindən aşağı çıxış etdi. Ola bilsin ki, adaptasiyada problemlər var. Bunu Avroliqa zamanı da görmüşük. (futbol11.az)
