Futbol tarixində ən məhsuldar qapıçı olan Rocerio Seni karyerasını bitirir.
Korner.az-ın məlumatına görə, Seni bu mövsümün sonunda yaşıl meydanla vidalaşacaq.
“San-Paulu”nun 41 yaşlı qapıçısı ilk dəfə klubun heyətində 1993-cü ildə çıxış etməyə başlayıb və 21 illik karyerası ərzində kluba sadiq olub. Qeyd edək ki, Seni dünyanın bütün qapıçıları arasında vurulan qollara görə liderdir. Karyerasında mindən artıq oyun keçirən Rocerio 114 qol vurub.
“Mövsümün sonunda karyeramı başa vururam” – deyə, Seni bildirib: “Bu, mənim təkcə “San-Paulu”da deyil, ümumiyyətlə professional futbolda sonuncu ilimdir. Bu zaman qeyd etməliyəm ki, özümü ötən il olduğundan da yaxşı hiss edirəm. Düzdür, bəzən haramsa ağrıyır, amma bu, futbolun bir hissəsidir”.
Rocerio Seni Ginnesin Rekordlar Kitabına salınıb. O, 2002-ci ildə Braziliya yığması ilə dünya çempionu olub.
