Hər mövsümün axırı elə ki “transfer pəncərəsi”ni açırlar ki, tər boğdu sizi, bir az “havalanın”, kimisi o “pəncərə”dən təpəsi üstə yumalanıb karyerasını məhv edir, kimisi də havanın təmizliyindəndimi, ya “skovznyak”danmıdı (“yelçəkən” yazsam, 10 nəfərdən 8-i anlamayacaqdı), bilmirəm, əməlli-başlı havalanır.
Məsəlçün, mən artıq 3 ildi izləyirəm, mövsüm qurtaran kimi Ruslan Abışovu harasa “transfer edirlər”. Özü də elə-belə klublara yox ha. Ağlın özgəsinə getməsin, Abışov mediatikdi, xarizmatikdi və bir az da futbol oynamağı var deyə, gərəkdi adı xarici klublarla hallansın.
Hə, bəs bu söhbətlər niyə məhz “Neftçi”ylə müqavilə müddəti qurtarıb yeni danışıqların aparılacağı vaxtlara düşür? Təsadüf? Yox, əzizim, bu qədər sadəlövh olma. Bunlar hamısı zərurətdən doğan məsələlərdi və naftalin qoxulu qiymətqaldırma “priyomlar”ındandı. Biri var danışıqlar masasına sıravi Ruslan kimi oturasan, biri də var, xarici klubların “hədəfindəki” Ruslan kimi. Hansının qiyməti baha olar?
Ötən illərdə İsveçrədən, Rumıniyadan təkliflər gəlirdi guya, noldu bəs? Niyə getmədi? Dinəndə hamısı deyir ki, legioner olmaq istəyirəm. Bəs gedəydi də. Sabun köpüyü partlamalıdı əvvəl-axır, ya yox?
İndi də haray-həşir salıblar ki, bəs “Antalyaspor” dəli-divanədi bundan ötrü. Axırda bezdirdilər Mehmet Özdiləyi, kişi çıxıb dedi ki, Ruslan kimdi alə, mən o adda futbolçu tanımıram. Yəni ki, balam, qız evində toy eləyirsiz, barı xəbər edin, gəlib qol açıb oynayaq, üzərlik yandıraq. Bu yandan da xəbər çıxıb ki, “Neftçi” Abışovla müqavilənin müddətini uzadacaq. Yəni “priyom” yenə işə yaradı.
…Bu oğlan indiyə qədər bu fəndi işlətdi və istədiyini əldə etdi: ilbəil pulunu qaldırdı. Bilirsiz maraqlısı nədi? "Neftçi" balaca uşağın da ifşa edəcəyi bu “dudka”ya niyə oynayır? Çoxmu əyləncəlidi?
P.S. Belə ucuz reklamlarla evini yıxmayın o uşağın, imkan verin, hərdən futbol da oynasın…
