Ramiz Məmmədov: “Ad çəkmək istəmirəm, amma gedənlər olacaq”

"Bu oyunda əsas heyətin 4 üzvü meydanda yox idi. Onların əvəzinə ilk hissədə baxışda olan 4, ikinci yarıda isə 3-nü meydana buraxdım".

Korner.az-ın məlumatına görə, bu sözləri "Qəbələ"nin baş məşqçisi Ramiz Məmmədov Almaniyanın II Bundesliqa təmsilçisi "İnqolşdadt"la oyundan sonra deyib. Təcrübəli mütəxəssis bu görüşdə nəticənin onun üçün önəmli olmadığını bildirib:

"Bu oyunda nəticə mənim üçün önəmli deyildi. Əsasən komandamın oyunu və xəttlərarası bağlar maraq dairəmdə idi. İlk hissədə komandam bunun öhdəsindən 70 faiz gəldi. İkinci hissədə uduzmağımıza baxmayaraq, daha yaxşı oynadıq. Oyun da yaxşı və maraqlı alındı.

Hansısa futbolçunun adını çəkmək istəməzdim. Baxışda olan futbolçulardan gedəni də olacaq, qalanı da. Ad çəkmək istəmirəm. Bununla belə, bugünkü heyət bizə ümid verir ki, onlar qarşıda komandaya daha faydalı olacaqlar. Emin İmaməliyev haqda bir söz deyə bilmərəm. Çünki o, hələ biz istədiyimiz kimi çıxış etmir. Fiziki cəhətdən çatdırmır. Lakin qarşıda 10 gün var. İnanıram ki, Emin də öz üzərində çox işləyərək bizim sıralarımıza qatılacaq. Ümumilikdə komandanın fiziki hazırlığından da razı qaldım".