“Biz MDB çempionatının yaradılmağı ideyasını müzakirə etməmişik və Rusiya klubları ilə bir turnirə getmərik”.
Bu sözləri Peşəkar Futbol Liqasının prezidenti Ramin Musayev Rusiya mətbuatına açıqlamasında deyib.
O, “Qazprom ASC”nin İdarə Heyətinin sədri Aleksey Millerin MDB çempionatının yaradılmağı ilə bağlı ideyasına qarşı çıxıb.
Musayev ümumiyyətlə, rusiyalılarla bir çempionatda çıxış etməyi məqsədəuyğun saymır: “İnciməyin, mən sözü birbaşa deyəcəyəm: Rusiya çempionatında baş verən çox şey bizim xoşumuza gəlmir. Sizin yaxşı oyunçularınız, maraqlı komandalarınız var. Onlar azərbaycanlı azarkeşləri cəlb edir. Etiraf edirəm ki, bizim ölkədə Rusiya futboluna biganə olan ailələr yoxdur. Məsələn, Andrey Arşavin “Arsenal”ın formasında meydana çıxanda, onu əcnəbi oyunçu saymırıq. Ona görə özümüzünkü kimi həyəcanlanırıq”.
PFL prezidenti 2004-cü ildə “Neftçi” ilə MOİK arasında Çempionlar Liqasında ilkin təsnifat mərhələsindəki oyunları yada salıb: “Həmin oyunları xatırlayın! Onda Bakıdakı matça düşmək istəyənlər stadionun tutumundan çox idi. Belə olan halda, UEFA ilə razılaşmalı olduq ki, insanlara pilləkənlərdə oturmağa icazə verilsin. Ancaq sizdə hakimlikdə nələr baş verir! Qalmaqal qalmaqal dalıncadır. Azərbaycan çempionatı Rusiya ilə müqayisədə daha təmizdir. Elə olur ki, bütün oyunlarda nəticə əvvəldən bilinəndir. Elə də olur ki, oyun bir komandaya lazım olan nəticəni əldə etməyənə kimi davam edir. Bizdə belə şeylər yoxdur və olmayacaq”.
