Peşəkar Futbol Liqasının (PFL) prezidenti Ramin Musayev bu gün AFFA-nın inzibati binasında PFL və Topaz birgə fevralın ən yaxşı futbolçusu, vurulan ən yaxşı qolun müəllifini və çempionatlarımız tarixində vurulan 10000-ci qolun müəllifinin mükafatlandırılması mərasimində fikirlərini bölüşüb.
Korner.az-ın məlumatına görə, qrum rəsmisi yerli futbolçuların iki nominasiyada fərqlənməsini xüsusi vurğulayaraq, sevincini gizlətməyib:
“Mən çox şadam ki, çempionatımızda vurulan 10 mininci qolun müəllifi Elvin Məmmədov oldu. Asif Məmmədova görə də sevindim. Onun da “Xəzər Lənkəran”a vurduğu qol Premyer Liqada fevral ayının ən yaxşısı seçildi.
Hərdən məndən də soruşurlar ki, niyə bombardirlər yarışında azərbaycanlı oyunçular yoxdu. Amma bilmirlər ki, bu, mənim günahım deyil”.
PFL başçısı daha sonra I diviziondan Premyer Liqaya komandanın gəlib-gəlməyəcəyinə də aydınlıq gətirib:
"İndi desəm ki, yayda aşağı dəstədən Premyer Liqaya iki komanda gələcək və vədə yetişəndə bu, baş verməsə, onda mən neyləyəcəyəm? Aşağı divizionda çıxış edən klublarla maraqlanmışam. Onlardan birinin gəlmək istədiyi dəqiqləşib.
Adını açıqlamayacağam, həmin komanda hazırda çempion olmaq uğrunda mübarizə aparır. Lisenziya da alıblar. Ancaq ikinci komanda sual altındadır. Əgər hansısa komanda Premyer Liqada oynamaq istəmirsə, biz onu məcbur edə bilmərik. Belə bir imkanımız olsaydı, onda çempionatı 12 yox, 18 komanda ilə keçirərdik”.
