Bu gün Azərbaycan kubokunun və superkubokunun təqdimat mərasimi keçirilib.
Korner.az-ın məlumatına görə,AFFA-nın inzibati binasında təşkil olunan mərasimdə Peşəkar Futbol Liqasının prezidenti (PFL) Ramin Musayev yeni superkubok haqqında bunları dedi:
"Superkubokla bağlı söhbət gedəndə Rövnəq müəllim dedi ki, bəlkə ölkə kubokun formasını dəyişək? Bu təşəbbüs əsasında işə başladıq. Milli ornamentləri özündə əks etdirir. Moskvada hazırlanıb.
Superkuboku qazanacaq ilk kluba kubok hədiyyə edəcəyik. Növbəti mövsümlərdə isə kubokun xərcini ödəyəcək qalib kluba həmişəlik veriləcək".
PFL başçısı daha sonra Premyer Liqa qaliblərinin mükafatının ləğv edilməsini belə izah edib:
"Çempionatın mükafatçılarına mükafatın ləğv edilməsi klubların öz təşəbbüsüdü. O məbləğ həmin klubların bir gənc futbolçusunun transfer pulu deyil heç".
Musayev daha sonra biletlərin qiymətindən şikayət edən azarkeşlərə səsləndi:
"Azarkeşlərin biletlərin qiymətindən şikayət etməsi düz deyil. 5 manat nə puldur ki? 5 manata avtomobil udmaq olar".
