Türkiyə yığmasında çıxış edən azərbaycanlı atlet Ramil Quliyev yeni mövsümün hazırlıqlarına Rusiyada, yanvarın 10-da başlayacaq
Bu barədə dünya çempionunun meneceri Olqa Nazarova TASS-a açıqlama verib. O bildirib ki, 27 yaşlı idmançı Moskvaətrafı Novoqorsk bazasında məşqlər edəcək. Bundan 4 gün sonra isə hazırlıq prosesinə sprinterin şəxsi məşqçisi Oleq Muxin də qoşulacaq. Quliyev Muxinin digər yetirməsi, Rusiyanın aparıcı sprinterlərindən sayılan Ruslan Perestyukla birgə çalışacaq.
Qeyd edək ki, əslən azərbaycanlı atlet karyerasında ilk dünya çempionluğunu bu il Böyük Britaniyanın paytaxtı Londonda 200 metr məsafəyə qaçış növündə qazanıb. Əvvəllər onun ən yüksək nəticəsi eyni məsafəyə qaçışda Avropa vitse-çempionluğu olub. Atlet 2011-ci ilədək Azərbaycan millisində çıxış edib. Türkiyəyə gedənədək idmançı Ümumrusiya Atletika Federasiyası ilə danışıqlar aparıb. Lakin onun Rusiya vətəndaşlığı almaq istəyi nəticəsiz qalıb.