"Qəbələ" futbol klubunun müdafiəçisi Rail Məlikov zədələnib. Müdafiəçi diz bağlarının qırılması nəticəsində 4-5 ay yaşıl meydanlara çıxa bilməyəcək.
Korner.az-ın millifutbol.az-a istinadən məlumatına görə, futbolçu açıqlamasında bunları deyib: "Məşqdə zədələnmişəm. Bakıda süni meydanda AZAL-la oyuna hazırlaşırdıq. Məşq zamanı Nizami Hacıyevlə toqquşdum. Ondan sonra ayağımda ağrılar hiss etdim. Amma yüngül zədə olduğunu düşünürdüm. Sonrakı məşqdə isə ayağımın bir azda ağrıdığını hiss edib müayinəyə getdim. Məlum oldu ki, diz bağlarım qırılıb. Ona görə də Türkiyəyə gedib əməliyyat olunmağım lazımdır.
Artıq sabah “Acıbadem” xəstəxanasına gedəcəm. Orada əməliyyat olunduqdan sonra həkimlərin nəzarətində olacağam. Ən azı 4-5 ay yaşıl meydanlardan uzaq qalacam. Yuri Syomin də mənim zədələnməyimə təəssüfləndi. Dedi ki, sən bizim əsas futbolçumuzsan, zədələnməyin çox pis oldu. Artıq əməliyyat olunub zədəmi sağaltmaq haqqında düşünürəm. İnanıram ki, hər şey yaxşı olacaq”.
