"Xəzər Lənkəran"ın kapitanı Rahid Əmirquliyev dünən "Fənərbağça" ilə oyundan sonra Korner.az-ın suallarını cavablandırıb.
– "Fənərbağça" ilə oyunda, demək olar ki, "Xəzər Lənkəran" heç nə edə bilmədi və məntiqi nəticəsi kimi darmadağın olundu – 0:4.
Bu oyun bizim üçün şou xarakterli idi. Bizim əsas matçımız "Makkabi" ilə 25-dədi. Bu oyunda da bir neçə qol imkanlarımız oldu. Sadəcə yararlana bilmədik. Əgər qol vursaydıq, başqa cür oynayacaqdıq.
– "Makkabi" ilə vacib oyun öncəsi bu cür ağır oyun oynamaq nə dərəcədə düzgündü?
Bilirsiz, bu oyun bizim üçün yaxşı təcrübə oldu. Hələ İsrail klubu ilə oyunumuza 4 gün var. İnanmıram ki, bu oyun bizim ziyanımıza olsun.
– "Fənərbağça" ilə oyun sizə nə qazandırdı?
Əsas təcrübə. Bu cür güclü klublarla oyunda yaxşı təcrübə qazanmaq olar. Ona görə də düşünürəm ki, yaxşı təcürbə qazandıq.
– Qarşıdan "Makkabi" ilə oyun gəlir. Hayfada 0:2 hesablı yenilgi ilə mərhələ adlamaq şansınızı, demək olar ki, xeyli azaltmısız. Səfərdən əlverişli nəticə ilə qayıda bilməməyinizə nə mane oldu?
Bizim bəzi oyunçularımızın, lap elə hamımızın məsuliyyətsizliyi ucbatından səfərdən yaxşı nəticə ilə qayıda bilmədik. Səfərdə bir qol vura bilsəydik, bu gün şanslarımız daha çox olardı. Lakin yenə şanslarımızın bitmədiyini düşünürəm.
– Belə çıxır ki, 0:2 hesablı məğlubiyyətin əvəzini çıxa biləcəksiz? Qol buraxmadan ən azı rəqib qapısına 2 top vurmalısız ki, əlavə vaxta daşıya biləsiz matçı…
Mümkündü. Əgər ilk dəqiqələrdə istədiyimiz qolu vura bilsək, nəticə başqa cür olacaq. Erkən qol vursaq, mərhələ adlaya biləcəyik.
Səxavət QURBANOV
