"Rəvan" klubunun vitse-prezidenti Bəhruz Şirəliyevin Korner.az-a müsahibəsi
– Ötən mövsümdə "Rəvan" uğursuz çıxış etdi. Yeni mövsümə isə daha ciddi hazırlaşırsınız. 2012-2013-cü il mövsümü üçün hədəfiniz nə olacaq?
Təbii ki, bu mövsümə hazırlıqlarımız daha ciddi gedir. Hədəfimiz mümkün qədər yüksək yerlərdə qərarlaşmaqdı. İlk növbədə çalışıb ilk "altılıq"da qərarlaşmağa, daha sonra avrokuboklara vəsiqə qazanmağa çalışıcağıq.
– "Rəvan"ın yeni baş məşqçisi Cevat Gülerin qarşısında qoyduğunuz şərt, yəqin ki, elə bundan ibarətdi?
Bəli. Biz məqsədlərimizi ona da başa salmışıq. Premyer Liqada mümkün qədər yüksək pillələrdə qərarlaşmaq və avrokuboklara vəsiqə qazanmaq istəyirik.
– Ötən mövsüm "Rəvan" baş məşqçi dəyişikliyində rekorda imza atdı. Bəhmən Həsənov – Vladislav Qədirov – Bəhmən Həsənov. Yeni mövsümdə də belə olacaq?
– Düşünmürəm ki, belə dəyişikliklər yeni mövsümdə də olsun. Bəhmən Həsənovu biz ilk dəfə dəyişəndə komanda 6 oyunda cəmi 3 xal toplaya bilmişdi. İkinci baş məşqçinin gedişi isə bizdən asılı olmayan səbəblərdən baş verdi.
Bilirsiz, bizim üçün komandanın nəticəsi daha öndədi. Əgər nəticə yoxdusa, dəyişiklik vacibdir. Bəhmən Həsənova ikinci dəfə şans verdik lakin yenə özünü doğrulda bilmədi.
– Vladislav Qədirovun gedişi bizdən asılı deyildir deyirsiz. Bəs bu kimdən asılıdı?
Bu onun öz səhvi oldu. Vladislav Qədirov öz səhvi ucbatından istefaya göndərildi.
– İlk dəfə Bəhmən Həsənova şans tanıdınız və 6 oyuna 3 xal topladı. Bəs niyə görə Vladislav Qədriovun gedişindən sonra yenidən komandanın sükanı arxasına onu gətirdiniz?
Premyer Liqada təcrübəsiz baş məşqçi olduğuna görə onu yenidən bu posta təyin etdik. Lakin yenə komanda yaxşı nəticə vermədi. Buna görə də Cevat Güleri bu posta təyin etdik.
– Bunu başa düşdüm Bəhruz müəllim. Əgər ona güvənmirdizsə, niyə Həsənova şans tanıdınız? Nə mənası var idi nəticə verə bilməyən birini yenidən bu posta təyin etməyə?
Dayanın, izah edirəm də! Biz Həsənova şans verəndə müvəqqəti təyin etmişdik. Mövsümün axırına kimi komandanı o çalışdırmalı idi. Sonrada gördünüz ki, yeni baş məşqçi gətirdik (Cevat Güleri nəzərdə tutur). Tanınmış mütəxəssisdi. Ona görə keçən il belə oldu.
– Transferlər yekunlaşdı, yoxsa yeniləri olacaq?
Mümkündü ki, bir transfer daha olsun. Məncə, biz artıq komandanı gücləndirmişik. Ola bilsin ki, bir futbolçu tranfer etdik. Həmin futbolçunun yerli olmasını istəyirik.
Səxavət QURBANOV
