"Rəvan” çempionata hazırlıqla yanaşı, transfer çalışmalarını da davam etdirir.
Korner.az–ın klubun saytına istinadən məlumatına görə, “uçan aslanlar” Ramil Həşimzadə, Emin Mustafayev, Nodar Məmmədov və Miloş Adamoviçdən sonra heyətinə 5-ci futbolçunu da rəsmən qatıb. Bu, Ramazan Abbasovdur.
2011/12 mövsümündə artıq "Rəvan”ın şərəfini qorumuş Abbasov "Bakı”dan ayrılaraq "Rəvan”a qoşulub.
Qeyd edək ki, 29 yaşlı yarımmüdafiəçi millinin də formasını geyinib. Belə ki, 2005-ci ildə Azərbaycan yığma komandasında debüt edən Ramazan ümumilikdə 7 matçda millinin şərəfini qoruyub.
Bu arada Şeriff Suma artıq komandanın üzvü sayılmır. Müqavilə müddəti başa çatan syerra leoneli müdafiəçi ilə yollar ayrılıb. Baş məşqçi Ramil Əliyev afrikalı futbolçunun taktiki planlarına uyğun gəlmədiyini düşündüyündən rəhbərlik Suma ilə vidalaşıb. Artıq Şerifflə bağlı bütün məsələlər həllini tapıb.
