Rəşad Sadıqov: “Hücumçu elədir ki, ona şərait yaratmaq lazımdı”
31.10.2020 , 19:47
“Bu oyunda komandamdan daha çox şey gözləyirdim. Mübarizə əsasən meydanın mərkəzində getdi”.
Korner.az xəbər verir ki, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının 8-ci turunda evdə “Səbail”lə qolsuz heç-heçə etdikləri oyundan sonra keçirilən mətbuat konfransında deyib.
O, meydanda bərabər səviyyəli oyun getdiyini bildirib: “Çox baxımlı futbolun şahid olmadıq. Halbuki daha yaxşı oynaya bilərdik. Bunun üçün potensialımız var. İstədiyimizi gerçəkləşdirə bilmədik”.
Bəzi epizodlarda futbolçularına sərt reaksiya verən baş məşqçi onlara dəstək olduğunu da vurğulayıb: “Mən özüm də bu cür reaksiya ilə az üzləşməmişəm. Bir çox məşqçi futbolçularından nə isə tələb edir. Heç də hər zaman belə deyiləm. Çünki onlara dəstək olduğum anlar da olub. Ona görə tələbkarlıq göstərirəm ki, daha yaxşı oynaya bilərlər. Futbol oynadığım vaxtda özüm də çox tələbkar olmuşam, epizodlara reaksiya vermişəm”.
Komandanın gürcüstanlı hücumçusu Davit Volkovun oyununun alınmamasının səbəbi barədə R.Sadıqov bunları deyib: “Son 3 oyunda qol vurmaqda çətinlik çəkirik. Cəmi 1 dəfə fərqlənmişik. Sumqayıtda yaxşı qol imkanlarımız oldu. “Qarabağ”la matçda bəzi epizodlarda yaxşı əks-hücuma keçdik. Qol epizodu yaratmaqda çətinliyimz var. Problemi sırf Volkovla əlaqələndirməzdim. Rəqiblərimiz də bizi analiz edir. “Səbail” yaxşı müdafiə olunurdu. Hücumçu elədir ki, ona şərait yaratmaq lazımdır”.
