“Qələbə üçün hər şeyi edəcəyik” – Faruk Hacibegiç
09.10.2020 , 19:03
Sabah Millətlər Liqasının qrup mərhələsinin III turunda Azərbaycan yığması ilə qarşılaşacaq Monteneqro millisinin baş məşqçisi Faruk Hacibegiç oyunöncəsi mətbuat konfransında fikirlərini bildirib.
Korner.az xəbər verir, o, qələbə üçün hər şeyi edəcəklərini söyləyib:
“Yaxşı komandaya qarşı oynayacağıq. Matça ciddi yanaşırıq. 6 xalla qrup lideri olsaq da, bu, bizim üçün elə də böyük üstünlük deyil. Məğlub olsaq 3 yığmanın 6 xalı ola bilər. Sabah biz qalib gəlib, Lüksemburqun uduzmasını gözləməliyik. Hələlik nəticələrdən razıyam. Lakin riyazi baxımdan birinci yeri təmin etməmişik. Futbolçulardan maksimum konsentrasiya xahiş edirəm. Azərbaycan yığması azlıqda Lüksemburqa qol vurub və səfərdə Kipri udub, hörmətəlayiq komandadı. Qələbə üçün hər şeyi edəcəyik. Bu matça elə yanaşıram ki, sanki dünya çempionu ilə qarşılaşacağıq”.
Azərbaycan millisinin AVRO-2004-ün seçmə mərhələsində Podqoritsada Serbiya və Monteneqro ilə 2:2 hesablı heç-heçəsini xatırlayan Hacibegiç keçmişə yox, gələcəyə baxmalı olduqlarını vurğulayıb: “Bizim üçün müsbət dinamika yaratmaq önəmlidi. Həmin görüşün nəticəsindən xəbərimiz var. Həmçinin bilirik ki, Azərbaycanın hələ də digər komandaları narahat etmək imkanı var. Bu, bizə də aiddi. Məqsəd rəqibə ciddi yanaşmaqdı”.
Podqoritsa şəhərindəki “Qradski” stadionunda keçiriləcək Monteneqro-Azərbaycan oyunu Bakı vaxtı ilə saat 17:00-da başlayacaq.
