"Məqsədimiz bir xal qazanmaqdı"
“Çempionatda yaranan uzun fasilə səbəbindən hazırlaşmaq üçün vaxtımız daha çox olub. Amma tam tərkibdə məşq edə bilməmişik. Çünki zədəlilərimiz olub".
Korner.az-ın məlumatına görə, bu sözləri "Kəpəz"in baş məşqçisi Mahmud Qurbanov Klubun rəsmi saytına müsahibəsində deyib.
Premyer Liqanın XIII turu çərçivəsində bu gün səfərdə qarşılaşacaqları "Qəbələ" ilə oyuna toxunan Qurbanov xal dalınca getdiklərini bildirib: "Hazırda bir futbolçudan başqa zədəsi olan digərlərinin vəziyyəti yaxşıdır və onlar ümumi halda məşqlərə qoşulublar. “Qəbələ” ilə çətin oyunun bizi gözlədiyini düşünürəm.
Buna baxmayaraq, səfərə xal arxasınca gedirik. İstəyimiz ən azı bir xaldır.İnşallah, buna nail olarıq.Çempionatda istənilən rəqiblə görüşdə qələbə qazanmaq mümkündür. Sadəcə, oynamaq lazımdır. O cümlədən də “Qəbələ” ilə oyunda uğura nail olmaq olar”.
Qeyd edək ki, "Qəbələ" – "Kəpəz" oyunu bu gün saat 14:00-da başlayacaq.
