Qurban Qurbanov: “Nyukasl”la oyun komandamız üçün çətin sınaqdır“
17.02.2026 , 17:45
“Qarabağ”ın baş məşqçisi Qurban Qurbanov UEFA Çempionlar Liqasının pley-off mərhələsində “Nyukasl”a qarşı keçiriləcək oyun öncəsi mətbuat konfransında danışıb.
Korner.az xəbər verir ki, Qurbanov matçın həm klub, həm də Azərbaycan futbolu üçün əhəmiyyətli olduğunu vurğulayıb. O, futbolçuların yüksək motivasiyaya sahib olduğunu və qarşılaşmaya ciddi hazırlaşdıqlarını bildirib:
“Bu oyun həm təcrübə, həm də sınaq baxımından çox önəmlidir. Rəqib çox güclü komandadır və hazırlıq üçün vaxtımız az olsa da, oyunçularım məsuliyyətli və motivasiyalıdırlar. Onların həvəsi mənə inam verir.”
Baş məşqçi rəqibin oyun üslubunun bəzi məqamlarda “Qarabağ” üçün çətin ola biləcəyini qeyd edib və komandanın ağıllı, disiplinli və yaradıcı oyun göstərməyə çalışacağını əlavə edib:
“Rəqibi analiz etmişik, imkan verməyən, intizamlı komandadır. Onlarda bəzi üstünlüklər var, amma futbolçularımızın bacarığı ilə meydanda fərq yarada bilərik. Azarkeşlərimizə açıq və maraqlı oyun göstərmək istəyirik.”
Qurbanov kadro vəziyyəti ilə bağlı da danışıb. O, Kadi Borgesin komandaya qayıdışının sevindirici olduğunu, lakin Nəriman Axundzadənin bu matçda iştirak edə bilməyəcəyini qeyd edib:
“Kadinin dönüşü bizə əlavə imkanlar verir. Start heyət oyun günü dəqiqləşəcək. Təəssüf ki, Nəriman bu matçda olmayacaq, onun yerinə yalnız aşağı yaş qruplarından oyunçu əlavə edə bilərik.”
Baş məşqçi matç öncəsi favorit məsələsinə də toxunaraq, “Nyukasl”ın güclü olduğunu, lakin “Qarabağ”ın da meydanda uğurlu nəticə göstərməyə çalışacağını bildirib.
