Qurban Qurbanov: “Napoli”yə qarşı diqqətli olmalıyıq”
24.11.2025 , 23:40
UEFA Çempionlar Liqasının Liqa mərhələsinin 5-ci turu çərçivəsində “Napoli” ilə matç öncəsi “Qarabağ”ın baş məşqçisi Qurban Qurbanovun mətbuat konfransı keçirilib.
Korner.az xəbər verir ki, təcrübəli mütəxəssis görüşlə bağlı fikirlərini bölüşüb:
“Çox gözəl bir şəhərdəyik və bizi böyük tarixə malik bir klubla oyun gözləyir. Antonio Kontenin komandası hər oyuna ciddi hazırlaşır. Biz də pis hazırlaşmamışıq. İstəyirik ki, oyunumuzun sonadək nizam-intizamını qoruyub saxlayaraq, dinamik və cəsarətli futbol sərgiləyək. Klub olaraq uzun illər görmüş olduğumuz işlərin nəticəsini bu turnirdə də göstərmək istəyirik. Oyunlara məsuliyyətlə yanaşsaq, nəticə də gələcək.”
Baş məşqçi həmçinin azarkeşlərə də mesaj göndərib: “Sabah meydanda diqqətli və əzmkar olmalıyıq. Azarkeşlərimiz üçün cəsarətli oyun göstərmək vacibdir.”
Qeyd edək ki, “Napoli” – “Qarabağ” matçı noyabrın 25-də “Stadio Diego Armando Maradona”da keçiriləcək və Bakı vaxtı ilə saat 00:00-da start götürəcək.
