Avropa liqası

Qurban Qurbanov: “Komandada böyük məsuliyyət var”

24.10.2018 , 15:18

“Qarabağ”ın baş məşqçisi Qurban Qurbanov Avropa Liqasında qrup mərhələsinin III turunda sabah “Voskla”ya (Ukrayna) qarşı keçirəcəkləri oyun öncəsi mətbuat konfransında jurnalistlərin suallarını cavablandırıb.

46 yaşlı mütəxəssis öncə oyunla bağlı danışıb:

– Hamı bilir ki, vacib oyuna çıxırıq. İki turdan sonra hər iki komanda xalsızdı. Oyun haqda çox danışmağa ehtiyac yoxdu. Komandanı tam hazırlamışıq. Hamı matça ciddi hazırlaşır. Düşünürəm ki, sabah maraqlı və gərgin mübarizə olacaq.

– Premyer Liqadakı texniki məğlubiyyət hadisəsindən sonra komandada psixoloji cəhətdən köklənmə necədi?

– Hər şey qaydasındadı. Səhvlər olacaq. Bu, tam fərqli turnirdi. Heç bir porblem yoxdu.

– “Vorskla” “dişinizə” uyğun rəqibdi. Bu, sizdə psixoloji təzyiq yaratmır?

– Başa düşürük. Ciddi qrupa düşmüşük. Komandada böyük məsuliyyət var. Sabah ən yaxşı oyunlarımızdan birini keçirməyə çalışacağıq.

– Donald Gerye sabah iştirak edəcəkmi?

– Durumu yaxşıdı və oynamaq ehtimalı var. Hər şey sabah müəyyənləşəcək.

– Əsas problemlərimizdən biri də hücum xətti ilə bağlıdı. “Vorskla”nın qapısına qol vurmağın yollarını tapa bilmisinizmi?

– Hələ oynamamışıq, axtaracağıq. Qalib gəlmək üçün mütləq qol vurmağa çalışacağıq.

– Oyuna azarkeş marağı o qədər də yüksək deyil. Azarkeşlərə səslənmək fikriniz varmı?

– Məncə, ehtiyac yoxdu. Onlar həmişə bizimlə olublar. İnanıram ki, sabah da xeyli sayda azarkeş olacaq.

– “Vorskla” ilk iki oyunda qol vura bilib. Bununla bağlı planınız varmı?

– Qol vuran komandadılar. Müdafiədə diqqətli və hücumda sürətli olmalıyıq. Hər şeyi nəzərdən keçirmişik və bunlara tam hazırlaşmışıq.

Son yazılar

Yuxarı