Topaz Premyer Liqasının XXIII turunda baş tutan “Zirə” – “Qarabağ” oyununda hesab açılmayıb.
Korner.az-ın məlumatına görə, oyundan sonra baş tutan mətbuat konfransında “Qarabağ”ın baş məşqçisi Qurban Qurbanov fikirlərini bildirib:
“Düşünürəm ki, maraqlı oyun alındı. Məncə, yalnız qol çatışmadı. “Zirə”yə uğurlar arzu edirəm, bizə qarşı layiqli mübarizə apardılar. Futbolçularımdan razı qaldım. Bundan sonra futbolçularımız milliyə gedəcəklər, onlara uğurlar arzu edirəm”.
– Fasilə ərəfəsində yoxlama oyunu keçirməyi düşünmürsünüz?
– Ən azından 1 oyun oynamağa çalışacağıq. Amma tam heyətlə olmayacağıq. Çalışacağıq ki, əvəzedici komandadan futbolçular götürüb, 1 yoxlama oyunu keçirək.
– “Qarabağ”ın futbolçuları Almaniya ilə oyunda milliyə nə qədər xeyir verə bilərlər?
– Məncə, Əfran yaxşı oynadı, amma son dəqiqələrdə yoruldu. Əfranın göstərdiyi oyundan çox razı qaldım. Ümumilikdə, futbolçularımın durumu pis deyil, özünüz gördünüz. Düşünürəm ki, futbolçularım milliyə xeyir verə biləcəklər.
– “Zirə” bu gün yaxşı mübarizə apardı. Bəlkə “Zirə” “Qarabağ”a yaxın olmadığınıı sübut etmək istəyirdi…
– “Zirə” – “Qarabağ” yaxınlığına görə sübut olunası bir şey yoxdur. Bizdən də yaxın komandalar var və biz bunu heç vaxt qabartmamışıq. Düşünmürəm ki, “Qəbələ” xal itirdiyinə görə futbolçularımda arxayınlıq var idi. Oyunlarımızın sayı azalır və hər oyunda qələbə qazanmağa çalışacağıq. Yenə deyirəm, hamının qarşısında başımız ucadır, heç kimdən utanmırıq. (futbol11.az)
