"Qarabağ"ın baş məşqçisi Qurban Qurbanov Avropa Liqasının pley-off mərhələsi çərçivəsində Hollandiya "Tvente"sinə qarşı keçirəcəkləri ilk oyun öncəsi fikirlərini açıqlayıb.
Korner.az-ın məlumatına görə, o, bu gün baş tutan mətbuat konfransında öncə bunları söyləyib:
"Vacib oyuna hazırlaşırıq. Tanış komandaya qarşı oynayırıq. Hansı ki, onlara məğlub olmuşuq. Rəqibin oyunlarına baxdım. Son iki oyunlarını daha çox izlədik. Hazırda rəqibin heyətində xeyli dəyişikliklıər var. Daha çox cavan kadrlara üstünlük verirlər. Çox aqressiv komandaya qarşı oynayacağıq. Çalışacağıq ki, az səhv edək, эlimizə düşən imkanlardan yaxşı istifadə edək. Düşünürəm ki, maraqlı oyun olacaq"
Qurbanov Maksim Medvedevin oynamaq ehtimalının olduğunu bildirib:
"Maksimin durumu hələ tam bəlli deyil. Amma sabah onun da oynamaq şansı var. Sabaha kimi vaxtımız var. Sabah qərarımızı verəcəyik"
Təcrübəli mütəxəssis, həmçinin, "Tvente"nin gücünü də qeyd edib:
"Hollandiya çempionatı güclüdü. "Tvente" də daim medallar uğrunda mübarizə aparır. Hollandiya klubundan o vaxt başqa şeylər tələb olunurdu. Düşünürəm ki, rəqib bu dəfə daha təhlükəli ola bilər. Çünki onları indi əvvəlkinə nisbətən elə də yaxşı tanımırıq. Ümumiyyətlə, Avropa komandalarını zəif hesab etmək olmaz. Biz əsas öz oyunumuza baxmalıyıq. Çalışacağıq ki, yaxşı nəticə qazanaq. Düşünürəm ki, indiki komandamız əvvəlkindən daha təcrübəlidi. Bu amil bizə haradasa təkan ola bilər. Biz rəqibi daha ciddi analiz edib, oyuna daha yaxşı hazırlaşmalıyıq. Aqressivlik komanda üçün yaxşıdı. Həmin oyunda aqressiv olmasaydıq, onlarla bacara bilməzdik. Həm aqressiv olmalıyıq, həm də diqqətli. Rəqibə boşluqlar verməli deyilik.
Ağdamlıların çalışdırıcısı, son olaraq, bunları dilə gətirib:
"Biz nə qədər onları araşdırsaq da, onlar da bizi araşdırır. Hesab edirəm ki, bizim hansısa cəhətdən rəqibdən üstün olduğumuzu desəm, bu, rəqibə hörmətsizlik olar"
