Çempionlar liqası

Qurban Qurbanov: “Bu, bizim üçün problem ola bilər”

17.08.2020 , 14:14

“Qarabağ”ın baş məşqçisi Qurban Qurbanovun Çempionlar Liqasının 1-ci təsnifat mərhələsində “Sileks”lə (Şimali Makedoniya) qarşılaşacaqları oyundan əvvəl mətbuat konfransı keçirilib.

Korner.az xəbər verir ki, mütəxəssis jurnalistlərin suallarını cavablandırıb:

– Çox danışmağa ehtiyac yoxdur. Hər bir halda, biz ilk təsnifat mərhələsində oynayırıq və nəticə də bir oyundan sonra bilinəcək. Diqqətli və məsuliyyətli olmalıyıq. Hər hansı bir problemimizi üzə çıxmağına imkan verməməliyik. Futbolçular da yaxşı hazırlaşıb, oyunun vacibliyini dərk edirlər. Maksimum çalışacağıq ki, yaxşı nəticə əldə edək.

– Rəqibin oyununu 2-3 cümlə ilə necə təsvir edərsiz?

– Rəqibin oyununu izah etmək üçün 2-3 cümlə az olar. Topla oynamağı sevən və öz oyun üslubu olan komandadır. Bu, bizim üçün problem ola bilər. Həddindən artıq diqqətli olmalıyıq.

– Ot örtüyündə sanki problem var, yoxsa bizə elə gəlir?

– Meydanda bəli, bir az problem var. İşçilər çalışır ki, sabahkı oyuna qədər meydançanı yaxşı vəziyyətə salsınlar.

– Yeni gələnlərin komandaya uyğunlaşması necədir?

– Yaxşıdır, Qəbələdə özlərini yaxşı tərəfdən göstəriblər. Amma rəsmi oyun olmadan nəsə demək olmaz. Buna baxmayaraq, peşəkar futbolçulardır.

– Siz hər rəqibə ciddi yanaşmısız. “Sileks”in çox zəif olduğuyla bağlı yazılar var. Siz və futbolçular da bunu oxuyur. Bu, sizə hansı çətinliklər yarada bilər?

– Futbolçular dərk edir ki, ÇL-də zəif rəqib olmur. Rəqibə ciddi yanaşırıq, fərdi olaraq sürətli futbolçuları var.

– Azarkeşsiz olsa da, doğma meydan amili var. Ancaq başqa komponentlərdə də “Qarabağ” üstündür. Bəs rəqibin üstünlüyü nə ola bilər?

– Mən hər zaman bir oyundan ehtiyatlanmışam. Bizim oyunlarda çox azarkeş olub və onlar bizim ən böyük dəstəkçimiz olub. İndi azarkeşsiz olan matçda bu “Sileks”in üstünlüyü ola bilər.

– Uroş Matiçin hazırkı vəziyyəti necədir və əsas heyətdə olacaqmı?

– Yəqin ki, əsas heyətdə olacaq. Bizə ən gec qoşulan futbolçulardandır. Çatışmayan cəhətlərini də aradan qaldıracaq. Ümumilikdə durumu pis deyil.

– Rəqibin heyətində hansı futbolçuları fərqləndirərsiz?

– Sağ, sol hücumçuları sürətlidir. Bundan başqa da keyfiyyətli futbolçuları var.

– Sabahkı oyunla bağlı planınız nədir?

– Sabah rəqibin əks hücumlarının qarşısını almaqda diqqətli olmalıyıq. Xüsusən hücumda olanda yaxşı müdafiə olunmalıyıq.

Son yazılar

Yuxarı