Qurban Qurbanov: “Böhran yorğunluqdan irəli gəlir”
31.10.2018 , 21:17
Topaz Premyer Liqasının VII turundan təxirə salınmış matçda “Qarabağ” və “Keşlə” üz-üzə gəlib. İkincilərin meydanında keçirilən görüşdə qalib müəyyənləşməyib – 1:1.
Oyundan sonra keçirilən mətbuat konfransında “Qarabağ”ın baş məşqçisi Qurban Qurbanov jurnalistlərin suallarını cavablandırıb. O, əvvəlcə görüş barədə fikirlərini bildirib:
– Qələbə üçün gəlmişdik, alınmadı. Oyun planımızda bir az çətinliklər oldu. Belə meydanda oynamaq da çətindi. Heyətdə müəyyən dəyişikikliklər var. Maksim məşqdə zədələnmişdi, Donald da zədəli idi. Futbolçular çox əziyyət çəkdi, yorğunluq hiss olunur. Tərlana da qarşıdakı oyunlarda uğurlar arzulayıram.
– Maksim, Gerye və Aqollinin durumu nə yerdədi?
– Aqollinin “Vorskla” ilə matça yetişmək ehtimalı azdı. Onlarla ilk oyunda zədələnmişdi. Maksimlə bağlı dəqiq məlumat verə bilməyəcəm. Boyun nahiyəsində zədə oldu. Gerye isə ən pis halda “Vorskla” ilə görüşə hazır olacaq.
– Jezniçak sol cinahda başlasa da, Rəşadla matçın gedişində yerini dəyişdi. Bu, nədən qaynaqlanırdı?
– Sol cinahda hücumlarımız fərqli idi. Rəşadı irəli çıxdığı üçün ora keçirdik. Həm Rahil, həm Rəşad, həm də Jezniçak yaxşı çıxış etdi.
– Yorğunluğun böhrana gətirib çıxarmasından qorxmursuz?
– Böhran onsuz da yorğunluqdan irəli gəlir. Əvvəllər də belə situasiya ilə rastlaşmışıq. Amma məğlubiyyətləri düzgün qəbul edərək bu səviyyəyə çatmışıq. Hamımız biz olmalıyıq. İçəridəki problemləri görürəm. İnsan yorğun olan zaman istədiyini edə bilməyəndə psixoloji yorğunluq yaranır. Təcrübəli komandayıq, başqa çıxış yolumuz da yoxdu. Yorğun da olsaq bu qrafikə uyğunlaşmalı və qələbə üçün daha çox əziyyət çəkməliyik.
– Son dəqiqələrdə iki əvəzləmə etdiniz. Ancaq tablodakı problemə görə əvəzləmə yubandı. İtirilən vaxta görə, buna dəyərdimi?
– 79-cu dəqiqədə əvəzləmə olmalı idi. Hakimlər tabloda rəqəmləri yazırdılar. Qoldan həmən sonra əvəzləmə etmək istədim. Bir dəqiqədən çox yubandı.
– Tərlan Əhmədov 4-lü müdafiə oynatması ilə tanınır. Bu dəfə 5-li müdafiə ilə oynamaları sizin üçün gözlənilməz olmadı?
– Gözlənilməz olmadı, amma buna az ehtimal edirdim. Paltardəyişmə otağında bunu gördük. “Keşlə” ötən illərdə də bu sistemdən ən yaxşı yararlanan komandalardan biri olub. Belə sistemə qarşı oynamışıq. Öz oyunumuzu daha da yaxşılaşdırsaq, istənilən sistemə qarşı oynaya bilərik.
– Qarşıdakı turda “Sumqayıt”la qarşılaşacaqsınız. Onlara qarşı daha da çətin olacağını düşünmürsüz?
– Ola bilər. İlk oyunda da belə olmuşdu. Oyunlar gərgin, çətin keçir. Futbolçularıma yorulmaq barədə düşünməyi yaxın qoymayacam. Yorğunluq olsa da, belə matçlara özümüzü hazırlamalı və daha aqressiv çıxış etməliyik. “Sumqayıt”ın oyunçularının fərdi bacarıqlarına görə, maraqlı oyun olacaq. (matç.az)
