"Çətin oyun oldu. Yaxşı oynamağımıza baxmayaraq yenə çatışmazlıqlarımız var. "Anderlext" hər komandaya qol vurmaq gücündədi. Azarkeşlərimizi sevindirə bildiyimizə görə çox şadam"
Korner.az-ın məlumatına görə, bu sözləri Avropa Liqası qrup mərhələsinin ikinci turu çərçivəsində keçirilmiş "Qarabağ" – "Anderlext" qarşılaşmasından sonra baş tutmuş mətbuat konfransında meydan sahiblərinin baş məşqçisi Qurban Qurbanov deyib.
Təcrübəli mütəxəssis sözlərinə belə davam edib:
"Düşünürəm ki, Şehiçə güvənmək lazımdı. Səhvlər hamıda olur. Bir insanın üzərinə çox getsək, o potensialını itirə bilər. Bu həmin Şehiçdi ki, bizim qələbə qazandığımız oyunlarda böyük rol oynayıb. Rəqib fiziki cəhətdən çox güclü idi. Rəqibin ən real qol vəziyyətləri standart vəziyyətlərdə oldu. Bunu təxmin etmişdik. Hər halda meydançanın vəziyyəti əvvəlkinə nisbtən daha yaxşı idi. İKinci hissədə bir az problemlər olsa da, sonda bizim xeyrimizə oldu. Biz öz oyunumuzu oynamaq üçün rəqibin qarşısını almalıyıq. Rəqib oyunçular həddindən artıq sürətli idilər. Lakin bütün bunları nəzərə almışdıq və buna uyğun hazırlaşmışdıq. Qrupda olan hər bir komanda bizdən güclüdü. Qazandığım oyunlar istəyin və azarkeşlərin hesabınadı. Hər halda həyatda mümkünsüz heç nə yoxdu. İlk hissədə qalib gəlib ikinci hissədə uduzsaq belə komandamdan razı qalacaqdım.
