“Bizi sabah güclü komanda ilə oyun gözləyir. Heyətlə bağlı problemlərimiz var. Vüqar Nadirov oynamayacaq. Həmçinin Reynaldo ilə Maksim Medvedevin də problemi var. Hər şeyə sabah aydınlıq gələcək. İstənilən halda, biz öz oyunumuzu sərgiləməyə çalışacağıq. Amma diqqətli olmağımız da vacibdi. Nəticənin necə olacağına baxarıq. İndi bircə onu deyə bilərəm ki, biz sadəcə qələbə qazanmaq istəyirik. Çünki ilk oyun bizim üçün çox vacibdi”.
Korner.az-ın məlumatına görə, bu sözləri “Qarabağ”ın baş məşqçisi Qurban Qurbanov deyib.
Avropa Liqasının üçüncü təsnifat mərhələsi çərçivəsində İsveçin “Hefle” klubu ilə ilk oyun öncəsi fikirlərini açıqlayan Ağdam klubunun çalışdırıcısı daha sonra bunları deyib:
“Bizim hədəfimiz ilk oyunda qol buraxmadan qələbə qazanmaqdı. Bu, çox vacibdi. Ola bilər ki, oyun 0:0 bitsin. Bu da pis nəticə sayılmamalıdı. Amma qələbə qazanmağımız daha yaxşı olardı”.
