“Qəbələ”nin baş məşqçisi Roman Qriqorçuk “Borussiya” ilə oyun öncəsi keçirilən mətbuat konfransında maraqlı fikirlər səsləndirib.
Korner.az-ın məlumatına görə, ukraynalı mütəxəssis almanlarla matç öncəsi bunları deyib:
“Rəşadın mətbuat konfransında iştirak etməsi onunla bağlıdır ki, o, stadionun yolunu tanıyır. Tebii ki, bu, zarafatdır. Ciddi tərəfdən baxsaq, Rəşad burda olacaq futbolçudur. Rəqib komandanı yaxşı tanıyır. Son üç oyunda nəticə anlamında heç nə qazanmadıq. Baxmayaraq ki, hər üç oyunda çox üstün idik rəqiblərdən. 9 xal qazanmalı olduğumuz halda 2 xal qazanmağımız onu göstərir ki, biz hücumu tamamlamaq sahəsində hələ çox iş görməliyik. Biz sabahkı oyuna bayram kimi yanaşırıq və istəmirəm ki, belə bayramöncəsi belə şeyləri xatırlayaq. “Krasnodar”la oyunda qələbə də qazana bilərdik. “Borussiya” ilə oyunun əvvəlində xeyli epizodumuz oldu dünya nəhənglərindən birinin qapısı qarşısında. Tanrı bu fürsəti bizə verib ki, qrup mərhələsindəyik. Və bu fürsətden istifadə edib yolumuza davam etməliyik.
Mənim futbolçularım da bu düşüncədədirlər və onların hər biri sabah ən yaxşı oyununu keçirməyə çalışacaq. Santosla Dodo sabahkı oyuna hazırdılar. Əslində heyəti müəyyən etmişik. Ancaq strateji məsələ olduğu üçün indi bu siyahını açıqlamaq istəmirəm. Obemeyanq unikal futbolçudur. Hətta bu cür fenomen oyunçu idman elmi üçün tədqiqat obyekti ola bilər. Çox çevik futbolçudur. Başa düşürük ki, onun qarşısını almaq çox çətindir, ancaq inanırıq ki, buna nail olacağıq.
Belə oyunlardarda əsas məsələ taktiki hazırlıqdı, rəqibin hücumlarının qarşısını almaqdır. Ancaq bu o demək deyil ki, biz müdafiədə oturacağıq. Bizim üçün əsas məsələ həmişə hücum olub və sabah da belə olacaq. Qrup mərhələsinə düşəndə papaqla sürpriz etmişdim. Növbəti sürpriz qrupdan çıxsaq, olacaq”.
