Qarayev Azərbaycan millisindən niyə imtina edib?
17.02.2020 , 19:01
18 yaşadək futbolçulardan ibarət Azərbaycan millisinin sabiq futbolçusu David Qarayev Rusiya mətbuatına açıqlama verib.
Korner.az xəbər verir ki, Rusiyanın “Kamaz” klubunun hücumçusu Azərbaycan vətəndaşlığından imtina etməsini səbəbini deyib: “Özümü tam olaraq vladiqafqazlı kimi hiss edirəm. AFFA-dan mənə zəng vuraraq demişdilər ki, 1995-ci il təvəllüdlü futbolçulardan yeni komanda qururlar. Azərbaycan yığmasına dəvət aldığım vaxt bir çox əcnəbini, məsələn, ukraynalıları milliləşdirdilər.
O vaxt Avropa çempionatına qatıldıq və Rusiya Futbol İttifaqı üçün yəqin ki, səhvən legioner sayıldım. Çünki Azərbaycanın gənclərdən ibarət komandasında bir neçə oyun keçirmişdim. Mən isə yalnız Rusiya vətəndaşlığını istəyirdim. Belədə mənə daha asan olurdu. Bu vəziyyətdə vətəndaşlığı geri qaytarmaq çətindir. Ancaq Azərbaycan tərəfi buna razılıq verdi”.
Xatırladaq ki, Davit yığmada 5 matç keçirib.
