Komandanın azarkeşlərini tərifləyən 24 yaşlı futbolçu Madridin digər təmsilçisi “Real”ın fanatlarına “ilişib”
“Qarabağ”ın Çempionlar Liqasının qrup mərhələsindəki rəqiblərindən “Atletiko”nun yarımmüdafiəçisi Yannik Karrasko maraqlı açıqlama ilə diqqət çəkib. Belçika millisinin üzvü “Real”lıların oyunları sakit tərzdə keçirdiklərini bildirib: “İspaniyanın ən çılğın azarkeşləri bizim fanatlarımızdı. Onlara sahib olduğumuz üçün çox şanslıyıq. Dəstəkləri sayəsində hər ev oyununu sanki bir nəfər artıq keçiririk. Uğurumuzda ən böyük pay sahibi olduqları üçün onlara minnətdaram. Bizim azarkeşlər arzulu, çılğın və fanatikdilər. Bunu “Real”da görməyiniz mümkün deyil. Onların azarkeşləri turist kimidi. Stadionda otursalar da, sanki oyunu evdə izləyirlər. Amma bizim azarkeşlərimiz şəhərin aşağı təbəqə nümayəndələri olduğundan, çox fanatikdilər”.
Qeyd edək ki, Çempionlar Liqasının III turunda “Qarabağ”la Bakıda qolsuz bərabərə qalan “Atletko” oktyabrın 31-də növbəti tur çərçivəsində Azərbaycan çempionunu qəbul edəcək.
