Korner.az “Qarabağ”ın Avropa Liqasının III mərhələsində rəqibi olacaq İsveçin “Hefle” klubu haqqında qısa arayışı təqdir edir.
Klub 1882-ci ildə yaradılıb. İlk mərhələdə xizəksürmə və konkisürmə klubu olub. 6 il sonra isə futbol şöbəsi açılıb. Eyni adlı şəhəri təmsil edir. 47 il müxtəlif liqalarda oynasa da, 2004-cü ildə yüksək dəstəyə yüksəlib. Ölkə miqyasında ən böyük uğuru 2006-cı ildə İsveç kubokunun finalına yüksəlməsidi. Əfsanəvi Henrik Larssonlu “Hefle” həmin oyunda “Helsinqborq”a 0:2 hesabıyla uduzub.
Baş məşqçisi Per Olssondu. O bu postda 2005-ci ildən çalışır. Oyunlarını "Norrporten Arena"da keçirir.
Avrokuboklarda 2 dəfə çıxış edib. UEFA kubokunun 2006-2007-ci il mövsümünün ilkin mərhələsində Uelsin “Llanelli” klubuyla səfərdə qolsuz heç-heçə etsə də, öz evində 1:2 hesabıyla uduzaraq ilk Avropa macərasını bitirib. İkinci dəfə Avropa Liqasının 2010-2011-ci il mövsümündə də çıxış edən komanda bir mərhələ adlayıb. Farer adalarının “LSİ Runavik” klubunu 2:1 və 2:0 hesablarıyla məğlub edən “Hefle” ikinci mərhələdə Tbilisi “Dinamos”una “ilişib”. Gürcülər hər iki oyunda 2:1 hesablı qələbə qazanıblar. Bu, isveçlilərin üçüncü avrokubok macərasıdı. Birinci mərhələdə ötən il “İnter”ə iki oyunun nəticəsinə görə 8:0 hesabıyla uduzan (3:0 və 5:0) Estoniyanın “Narva Trans” klubuyla qarşılaşan isveçlilər evdə 5:1 səfərdə isə 3:0 hesablı qələbəyə imza atıblar. “Qarabağ”ın rəqibinin ən gözlənilməz nəticəsi elə bu gecə oldu. Səfərdə Kiprin “Anortosis” klubuna uduzan “hefle”, cavab matçında 4:0 hesabıyla qələbə qazanmaqla böyük sürprizə imza atmış oldu.
