Almaniya Bundesliqasında çıxış edən "Ayntraxt"ın baş məşqçisi Armin Veh mövsümün sonunda komandanı tərk edəcək.
Korner.az-ın məlumatına görə, bu barədə Frankfurt klubunun İdarə Heytəinin rəhbəri Heribert Bruxagen açıqlama verib.
O, baş məşqçi ilə danışıqların mənfi nəticələndiyini bildirib: "O, 3 ildi "Ayntraxt"da uğurlu nəticələr qazanır. Müqaviləsini uzatmağa çalışdıq, amma nəticə ala bilmədik".
Veh özü də gedəcəyini təsdiqləyib. Məşqçi bildirib ki, onun Frankfurtdan gedəcəyi çoxdan bəlli imiş.
"Frankfurter Allgemeine Zeitung" qəzeti isə "Ayntraxt"ın yeni baş məşqçisinin adını açıqlayıb. Qəzet iddia edib ki, 2007-ci ildə "Ştutqart"ı çempion edən Vehin köməkçisi olmuş Markus Babbel komandanın başına keçəcək.
Qeyd edək ki, "Ayntraxt" cari mövsüm Avropa Liqasının play-off mərhələsində "Qarabağ"ı mübarizədən kənarlaşdırıb. Bakıdakı oyunda 2:0 hesablı qələbə qazanmış Armin Vehin yetirmələri Frankfurtda da təmsilçimizdən üstün olmuşdu – 2:1.