“Qarabağ”ın yarımmüdafiəçisi Dani Quintana “tintamarilla”ya müsahibə verib.
Korner.az həmin müsahibəni təqdim edir:
– “Qarabağ”a keçidiniz haqda danışın…
– “Qarabağ” məni 2014-cü ildə transfer etmək istəyirdi. Lakin mən son anda Səudiyyə Ərəbistanıya getdim və “Əl-Əhli” ilə müqavilə imzaladım. Transfer qiymətimə görə, “Qarabağ”a keçidim baş tutmamışdı. “Əl-Əhli”də istədiyim kimi oynamadım. Mövsüm ərzində Polşada və Səudiyyə Ərəbistanıda oynadığım üçün artıq 3-cü klubun formasını geyə bilməzdim. “Əl-Əhli”dən ayrıldıqdan sonra “Qarabağ” mənə yenidən təklif göndərdi. 2015-ci ilin əvvəlində Ağdam klubu ilə 3 illik müqavilə imzaladım.
– Azərbaycan Premyer Liqasının səviyyəsi necədir?
– İqtisadi böhran Azərbaycan Premyer Liqasına da öz təsirni göstərib. Buna baxmayaraq, çempionat yaxşı səviyyədədir. Buna “Qəbələ” və “Qarabağ”ın Avropa Liqasının qrup mərhələsində çıxış etmələrini göstərmək olar. ”Anderlext”i səfərdə məğlub etsəydik, tarix yaza bilərdik.
– “Qarabağ” ardıcıl 2 dəfə Avropa Liqasında çıxış etdi. Bu mövsüm komandanın əsas hədəfi nədir?
– Avropada debüt mənim üçün xoş xatirədir. “Anderlext”lə səfər oyununda da qol vurmağa müvəffəq olmuşdum. Biz turnirdə möhtəşəm oyunlar keçirmişdik. Təəssüf ki, qrupdan çıxmağı son anda bacarmadıq. Bizim məqsədimiz hər il avrokuboklarda uğurlu çıxış etməkdir. Bunu niyə də bacarmayaq? Heyətimizdə təcrübəli futbolçular var.
– Vaxtı ilə Las Palmasda doğulan İvan Benites Bakı “İnter”ində uğursuz çıxışı ilə yadda qalıb. Ümumiyyətlə, ispaniyalı futbolçular Premyer Liqaya necə adaptasiya olur?
– İspaniyalı futbolçular Azərbaycana asan şəkildə uyğunlaşırlar. Burada həmyerlilərim var və onlarla tez-tez görüşürük. Azərbaycan müsəlman ölkəsidir. Burada sərbəst hərəkət etmək mümkündür. Mənim “Qarabağ”a uyğunlaşmağım asan oldu.
– Premyer Liqada 10 qol vurmusunuz. Bombardirlik haqda düşünürsüz?
– Əsas olaraq komandamızın uğur qazanmasıdır. Bombardirlik barədə düşünmürəm. Mən hücumçu deyiləm, hücumameyilli yarımmüdafiəçiyəm.
– Doğulduğunuz şəhərin komandasının oyunlarını izləyirsiniz?
– Əlbəttə, izləyirəm. “Las Palmas”ın La Liqanın turnir cədvəlində 9-cu pillədə olması məni çox sevindirir. İstərdim ki, növbəti mövsüm “Las Palmas” daha da iddialı olsun.
