“İnter” – “Qarabağ” (0:2) matçından sonra qonaqların yarımmüdafiəçisi Elşən Abdullayev jurnalistlərin suallarını cavablandırıb:
– “İnter”in çətin rəqib olduğunu bilirdik. “Qarabağ”ın bu komandaya qarşı oyunları asan keçmir. Gözlənildiyi kimi də oldu. Matçın sonlarına yaxın istəyimizə çatdıq. Mən bunu daha çox “İnter”in yorulması ilə əlaqələndirərdim. Top daha çox bizdə olduğundan rəqib sona yaxın boşluqlar buraxdı və biz də lazımi nəticəni təmin etdik.
– “İnter”in ehtiyat oyunçular skamyasında futbolçu qıtlığı olduğunu bilirdiz. Yəqin ki, sona yaxın istəyinizə çatmaq sizin üçün gözlənilməz olmadı…
– Çalışırdıq ki, ilk dəqiqələrdən fərqlənək. Düzdü, çətinlik çəkəcəyimizi bilirdik, amma son dəqiqələrdə də olsa, istəyimizə çatdığımıza görə şadam.
– İlk dəqiqələrdə fərqlənməyinizə nə mane oldu?
– Daha çox rəqib müdafiəsini yarmaq üçün topla çox oynasaq da, “İnter” çox yaxşı müdafiə olunurudu.
– Qarşıdan “Atletiko” ilə oyun gəlir. Bu barədə nə düşünürsən?
– İlk dəfədi ki, ÇL-də çıxış edəcəyik. İnanıram ki, oyundan-oyuna artıracağıq. Düzdü, “Atletiko” güclü komandadı, amma hər şey ola bilər.
