Avropa Liqasının pley-off mərhələsinin cavab matçında Almaniyada “Ayntraxt”la görüşəcək “Qarabağ” səfərə sabah çıxacaq.
Korner.az-ın apasport.az saytına istinadən verdiyi məlumata əsasən, oyunun keçiriləcəyi məkana bu gün çarter reysi ilə uçmağı planlaşdıran komandanın planları pozulub.
Belə ki, Almaniya tərəfi təyyarəni qəbul etməklə bağlı məsələdə təmsilçimizə müəyyən əngəllər yaradıb. Bu üzdən hətta komandanın Frankfurta sabah hansı saatda yollanacağı dəqiq deyil.
“Qarabağ” səfərə 19 futbolçu ilə gedəcək. Zədə üzündən ilk qarşılaşmanı və Topaz Premyer Liqasının son turunu buraxan Reynaldo Silva da komanda ilə birgə olacaq. Fərdi məşqlərlə kifayətlənən braziliyalının meydana çıxacağı hələ tam dəqiqləşməyib. Cənubi amerikalının durumunu nəzərə almasaq, heyətdə zədəli futbolçu yoxdur. Təmsilçimiz səfərə azarkeş və media nümayəndələri olmadan çıxacaq.
Klubun meneceri Asif Əsgərov isə artıq Frankfurtdadı. Avqustun 29-da baş tutacaq görüşdən bir neçə gün əvvəl Almaniyaya yollanan klub rəsmisi “Qarabağ”ın səfəri ilə bağlı detalları həll etməkdədi.
