“Qarabağ”ın Çempionlar Liqasının pley-off mərhələsindəki rəqibi bəlli oldu
30.01.2026 , 15:25
UEFA Çempionlar Liqasının pley-off mərhələsi üzrə keçirilən püşkatmada “Qarabağ”ın rəqibi müəyyənləşib.
Korner.az xəbər verir ki, İsveçrənin Nyon şəhərində baş tutan mərasim Bakı vaxtı ilə saat 15:00-da start götürüb.
Liqa mərhələsini 22-ci sırada başa vuran Ağdam klubu pley-offda səpələnməmiş komandalar arasında yer alıb. Püşkün nəticəsinə əsasən, Azərbaycan çempionu bu mərhələdə İngiltərənin güclü təmsilçisi “Nyukasl”la qarşılaşacaq.
Cütlük üzrə ilk görüş Bakıda keçiriləcək, cavab oyunu isə səfərdə baş tutacaq. Pley-off qarşılaşmaları 17–18 fevral və 24–25 fevral tarixlərinə planlaşdırılıb.
Bu mərhələnin qalibi 1/8 finalda liqa mərhələsini 5-ci pillədə tamamlayan “Barselona” və ya 6-cı yerdə qərarlaşan “Çelsi” ilə üz-üzə gələcək.
